漆黑樂

April 25, 2009 (Saturday)

     原本星期六夜晚, 三妹約好了我, 一家人係後園玩bbq, 食物還一早醃好!! 點知將近黃昏時, 開始落大雨,還行雷閃電!! 屋企啲燈, 閃下又着下, 最後, 屋企連電都停埋!! 初頭諗住啲電停一陣會好返!! 點知等好耐, 都仲係停電!! 而且, 雨越落越大!! 都燒唔到bbq! 最後, 趁有啲日光, 就拿拿聲, 轉為打邊爐!!

      好彩, 媽咪屋企有個gas 爐, 而且, 媽咪實放幾瓶gas 看門口!! 所以, 停電都唔洗出街!! 都可以照開到飯!! 其實, 打邊爐仲好, 可以清下雪櫃啲食物, 停電停得耐, 雪櫃啲野食都唔放得耐, 最好處理方法, 就係食埋佢!!哈哈!!

      雖然, 由bbq 轉做打邊爐, 但全部人都食得好開心!! 由其事, Brian. 因為他未試過停電打邊爐架! 對佢黎講, 今次, 在漆黑中打邊爐, 他感覺好新鮮!!! 不過, 我都覺摸黑打邊爐真係好特別! 因為個個都會高聲問清楚 (什至, 用光照清楚) 啲食物熟唔熟, 先至食!! 哈哈!!

     又唔知點解, 今次三妹男朋友, 帶咗一set 攝影器材黎我媽咪度, 而攝影器材當中有一盞類似人鑽礦用嘅"cool"頭燈, 依盞燈係黑暗當中發煇好大作用!!  令到我哋在黑暗當中打邊爐時, 好像見到註光咁!! 哈哈!! 就係因為依盞燈, 我哋唔係好洗點蠟燭都打到邊爐!! 哈哈!

     年年回暖, 三妹都係攪bbq 嘅攪手, 但年年她提議bbq 個日子都係落雨, 記得有一年, 我哋試過燒燒下野食, 就落起微雨上黎, 全家膽住把傘bbq, 其實都幾郎揹!!  哈哈!! 雖然, 當時燒隻雞翼食係比較耕辛!! 但到依家我都記得, 証明我都幾享受個過程!哈哈!

↓停電.....打邊爐

↓打邊爐, 有啲材料原本係攞黎bbq 架!! 但停電, 又攞埋雪櫃啲物資, 變咗一個好豐富嘅打邊爐餐!!(我媽咪直情打比啲鄰居, 叫人一齊打邊爐...但鄰居買咗外賣了) 最開心, 就係有盞攝影用嘅燈, 令到我哋打邊爐更有氣氛!!

↓三妹男朋友用專業相機加埋他頭上帶住盞燈, 竟然影到以下三張相, 都唔似停電所影出黎嘅? 依個打邊爐日, 無燈之餘, 個個人仲攞住把扇....."put" 涼!! 哈哈! (我收埋床下低啲hello kitty 扇發輝用武之地....人人爭住"put")

    我哋食完打邊爐, 仲未有電用, 電視又無, 收音機又無, 大家你眼望我眼, 真係唔知點好!! 哈哈! 其實, 停電繞圍都唔廣!!  街口啲商店都仍然有電用, 所以, 決定成家人出去飲咖啡, 食甜品, 消磨下時間! 平時媽咪唔會同我哋出街飲野架!! 但今次, 點都帶埋媽咪出去.....大家玩得好開心!! 傾咗好耐!! 真係停電嘅意外收獲!! 哈哈!! 連Brian都食dessert食得好開心!! 仲請客.....哈哈!!
 
    食完dessert, 飲完咖啡...返到屋企已經零晨12點, 而且,屋企有返電...有電用真係好有用, 電好重要..總之, 有電就好開心!! yeah!!

↓去西餐廳甜品, 飲咖啡.....(以下啲相係三妹男朋友影架!!)

↓係餐廳食嘅甜品, and 飲品 (以下啲相係三妹男朋友影架!!我邊度咁識步觸鏡頭吖!!哈哈! )