February 28,2009 (Saturday)
我三妹-----係全屋最多鬼主意嘅人, 講得唔好聽咪古靈精怪囉!! 哈哈!! 雖然, 係父母心目中係唔多乖, 但我哋五姐妹, 就係有了三妹在家, 增加了好多歡樂氣氛!! 哈哈!!!
今年三妹生日, 我同Brian 好緊張, 由其事Brian, 他還緊張過我, 可能三妹and 三妹男朋友最同Brian 岩key, 而且, Brian 比較偏錫我三妹, 因此, Brian and 我一早買定生日禮物送比三妹! 我哋就係等待三妹收禮物嘅驚喜!!
三妹生日當天還要上班, 要等到晚餐時段才返到屋企!!! 我哋今餐生日飯, 就係一家人玩打邊爐.......在零下20℃幾打邊爐, 感覺特別暖!! 後來, 我哋打邊爐打到溫暖得滯, 仲要開窗繼續打, 係加拿大開窗打邊爐, 真係好像開咗超級cool冷氣咁.......但就食得好開心!! 仲比平時食得多, 食得耐添!!
一講到生日, 生日蛋糕, 生日禮物, 當然,唔少得.......四妹and 五妹還表演唱歌添!! 她們歌咗一首歌叫We're younger than you 比三妹聽, 有埋動作, 有埋道具, 超好笑!! 而我 and Brian 就送了一部電話比三妹, 一早unlock 晒!! 三妹收到電話, 當然超開心, 開禮物時, 仲好驚訝, 張開晒咀!! 知道係電話......三妹, 仲立刻攞部電腦黎轉送資料入電話....仲研究咗部電話好耐先捨得切蛋糕...哈哈!
到夜晚(真係好夜), 我哋幾姐妹, 加埋幾姐妹啲男朋友仲走出街一齊飲野添!! 生日當然要盡興啲, 玩到夜一夜先返屋企......哈哈!! 算喇!! 生日玩夜啲, Daddy and mummy 唔會鬧架!! 哈!
↓一家人打邊爐,哈哈!!............三妹男朋友比較喜歡研究攝影, 所以, 依日啲生日相,係晒依部機裡面!!! 
↓三妹生日禮物---就係依部電話.........而三妹一早買了意大利雪糕比我哋品賞!
↓我依日仲同啲妹玩化妝, 我自己終於, 第一次畫了上下眼線了....
----------------------------------------------
We are younger than you (歌詞)
•其實照happy birthday 首歌咁唱
Happy birthday to you
Happy birthday to you
Happy birthday to 三妹(名字),
We' re younger than you....
三妹生日
與朋友聚會+寫blog 兩周年
February 27, 2009 (Friday)
還記得, 我同Brian 讀大學果個年代, 身邊大部份同學都有個美國夢, 無論, 讀什麼學系啲人都好想畢業之後, 能夠在美國工作!! 最後, 選擇才留在加拿大!! 我當時也覺好好笑...加拿大人都唔想係加拿大?? 唔通美國真係香啲咩?? 但事實如似!! 亦可能當時美國人工, 真係相當吸引吧!! (*註: 當時還未911)
離開加拿大去美國工作, 係Brian 個屆畢業啲朋友最為明顯, Brian 年紀雖大我一年, 但他讀書時, 是高我兩年級!! 我眼見Brian 啲朋友一個又一個離開, 去了美國, 或者第二個地方找工作!! 真係得好少數留係加拿大工作.....雖然, Brian 啲朋友去了外國, 但仍然同Brian 有聯絡.....係男生當中, 我覺少見!! 因為, 男生唔會好似女仔咁, 咩都講架嗎!!!
就係上星期, 接到電話, Brian 有啲大學同學, 由美國返黎加拿大探親!! 每次, 依啲朋友返黎加拿大, 一定會抽時間和Brian 一起短聚!! 大家出外飲下野, 傾下計!! 講真, 我聽到Brian 啲朋友預先約定Brian 出街街, 我真係感覺好溫暖架!! 千里條條由美國渣車返加拿大, 都願放棄休息時間, ....真係好難得!
剛剛過去星期五, 我同Brian 齊齊去了, Brian 大學朋友聚會添!! 大家一齊有傾計, 又講笑, 飲紅酒, 真係好開開心心! 過咗一個好多笑聲嘅晚上!
--------------------------------------------------------------------------
去咗Brian 個大學朋友聚會, 我真係好感動! 我一邊去個聚會, 我一邊在想, 我以前讀書啲朋友呢? 去咗邊度?? 我係加拿大明明都有讀過書, 我都曾經為了身邊啲朋友啲事項, 而擔心 or 流淚....而家係msn 見到, 係facebook 見到大家, 咁又點呢?? 我主動講無兩句就走開咗, 我話約出黎, 時間又好像配合唔到.....做主動都無咩人理, 我真係會卻步, 唔識再做主動了!!
其實, 我都好珍惜, 見每一個朋友....可能, 人大咗吧, 好想更加keep 住身邊啲朋友由其事, 我身處加拿大, 有時想返起香港啲朋友點對待我, 真係覺得好感動, 因為, 我講咩啲朋友都記住, 好上心....對我好好!!! 但感覺自己特別, 因竟然大部分了解我啲朋友都在香港!!
寫blog寫了兩年了....初頭, 開blog 完全是為了留一個言給一個朋友, 自己沒有打算寫blog的..... 因為, 我自己有手寫日記習慣.......但正當, 依個時候, 自己在學習中文打字, 就借一借blog 依個平台, 打下自己生活上啲無料野黎練習打字. 但竟然, 有人看我寫blog, 竟然, 又有人留言比我.....我又竟然, 會八下人哋啲blog,..... 又突然間, 比我係blog 上, 識了一班新朋友, 有啲blog 友已經變為我友好朋友添!.... 而家, 寫blog 已經係我生活一部份, 就係因為blog 令我在生活上, 變得更加精彩!! 我又好好彩, 識啲blog 友個個都係有善, 對我好好! 我真係好感謝上天卷顧我!!!
多謝, 大家聽我講野...得閒多啲黎坐喇!!哈哈!
ICE FEST
February 22, 2009 (Sunday)
原本, 我沒有準備去看Ice Fest (冰雕節), 雖然, 年年都有, 而且, 攪冰雕嘅地點, 好近自己屋企, 行都行到去, 但人就係咁, 啲地方越近自己所處, 反而沒有激動去行....哈哈!! (而且, 早排都係電視都睇咗啲冰雕喇!!!!)
星期日, Brian 需要買自己啲日用品!!! 我緊係跟他出去喇!! 我仲諗住, Brian 都係渣車出街買野, 所以, 我就求求其其着件褸出去囉!! 仲諗住自己坐係車度, 都唔會點凍, 所以, 我穿着得比較輕便(其實係單薄).....點知, Brian 渣渣下車就去咗第二個方向 (ice fest 方向).....
我話: 「Brian 你想去邊呀??」
Brian 話: 「想親眼,望望今年啲冰雕!!! 」
我話: 「但ice fest 果樹好難迫車架喎!!」
Brian 話: 「試下兜去睇下, 如果揾到車位就去望下啲冰雕喇!!」
一入去Ice fest 範圍, Brian 竟然揾到個車位!! 仲要個車位好近冰雕地方添! 就係咁, 我就無端端走咗去冰雕展, 我仲要毫無準備, 着到好單薄, 仲無帶手套, 去望啲冰雕, 感覺真係好凍呀! 好彩, 今年, 有好多人參觀冰雕展, 有人群幫我遮咗啲風...哈哈!! 但太多人, 影相就有啲唔方便, 成日都要等啲人散開咗啲先影到冰雕相!
記得有年冰雕展, 好似係雕動物, 今年, 冰雕就係雕世界各地名勝為主題!! 而今次冰雕展,我只睇咗一陣.....之後,我就比啲店鋪吸引住, 走咗去行街 (行Yorkville)哈哈!! 攪到好遲先同Brian 買日用品!哈哈!!
↓有英國代表--大笨鐘, 仲有, 比薩--斜塔
↓有多倫多地標CN Tower 呀!! 隔離仲有個雕咗廣告商名嘅冰雕..哈哈!
↓有巴黎鐵塔, 啲細路仲趴咗入鐵塔裡面添! 而有啲冰雕係為啲贊助商雕架!!所以,有啲冰雕係有贊助商名架!! 
↓有埃及--獅生人面像,日本寺院., 加拿大土註代表圖案....總之, 今年, 有好多好多冰雕and 好多好多人去觀看冰雕喇!!......去觀賞冰雕啲人個個都着到去滑雪咁!!唔識我啲人, 見我着到咁單薄, 仲以為我唔怕凍添!!! 其實,我好怕凍, 十一月返香港都覺凍架...哈哈!!
09' 年第一次打邊爐
February 21, 2009 (Saturday)
都估唔到, 我係2009 年過咗成個幾月, 我都係第一次係自己屋企打邊爐!!! 上個月, 啲天氣都差唔多日日都好寒冷, 我竟然醒唔起要係屋企打邊爐添! 依我咁喜歡打邊爐依個玩意嘅我, 咁耐都唔打邊爐, 真係覺有點怪!!! 哈!!
可能, 就係一場雪暴!!! 令我打邊爐嘅心情又再復燃...哈哈! 一早聽天文台話星期六(Feb 21) 會有雪暴, 我就好似聽到打仗依個消息咁, 立刻去chinese 超市買啲存糧....當中買了唔少打邊爐材料....準備落大雪, 打邊爐!
今次去chinese超市掃貨, 比我見到有一盒盒日本麵豉湯醬賣, 我就靈機一觸, 用麵豉湯黎打邊爐,....原來, 用麵豉湯打邊爐又幾好, 清清哋.....啲食物入晒麵豉湯味,...都幾似日式火窩架!!! 由其事, 落啲烏冬係火窩湯低淥, 食烏冬時, 真感覺到去日本餐廳, 食烏冬嘅味道...哈哈!!! 下次, 打邊爐再encore 過麵豉湯先得!!
↓係chinese 超市入啲打邊爐食物, and 一啲啲零食.....準備留家避雪暴!
↓雖然話, 有雪暴, 無咩必要都唔好出街...但我星期六一起身, 見仲未落雪, 天色只係暗暗哋, 我個心忍唔住, 好想出街行, 所以, 就"聊" Brian 同我出街食bagel....點知食完Bagel 無幾耐, 場雪就黎喇!! 真係好大雪呀!!..(我食B.L.T bagel, Brian 食salmon bagel)
**不過, 天文台將依場雪暴,講到好大咁!! 但end up 啲雪又唔係落好多! but, 我都多謝天文台講到場雪暴好大件事...令我可以係自己屋企慢慢渡過一個weekend!
向自己身體挑戰
又等到星期五....好開心, 又有weekend 放, 由於, 天文台話星期六落大風雪, 所以, 我可以留係自己屋企, 同Brian 一齊享受weekend, 但因為知道有大風雪, 見星期五場風都仲未黎, 就嗱嗱聲出去食餐dinner 先, ....一放工, 交易埋Brian 啲電話, 就向上海菜出發!!
我有段時間無食上海菜了, 去到餐店, 真係咩都想嗌, 咩都想食.....我哋仲叫咗客東坡肉食.....雖然, 自己都知東坡肉含有好多fat.....又唔知自己身體狀況可唔可以負荷得到, 但唔好理, 食咗先算......哈哈!!
嘩!! 啲東坡肉fat好軟淋淋, 又入味, 真係好好味..... 我係要同Brian 先享受到依啲食物, 因為, 我自己屋企人 and 身邊啲朋友, 一定唔會食"東坡肉"架!! 真係好滿足嘅一餐上海菜!
食完dinner之後, 仲去台灣店外賣一杯峰蜜珍珠綠茶當dessert, 哈哈!! 當我飲飲下珍珠綠茶時, 我竟然諗起 "耳分天下" 嘅啜珍珠遊戲......自己好想玩啜珍珠, 但當時, 一諗起耳分天下, 就笑到收唔到聲, 哈哈!!! 我都係費事玩啜珍珠, 啜到"勤"襯, 咁點算? 所以, 我後尾都好正常咁享受我杯蜜峰綠茶!....哈哈!!
↓食咗蒜泥白肉, 咸豆漿配油條, 小籠包, 京醬炸醬麵
↓東坡肉 and 蜜峰綠茶
肥肥矮矮
February 19, 2009 (Thursday)
好喜歡買杯, 廚房有好多杯....近來, 好喜歡用肥肥矮矮杯.....
在二月頭, 同Brian 經過starbucks 咖啡店, 見到有隻肥肥矮矮杯賣....但我當時, 竟然control 住自己, 叫自己唔好再買杯, .....所以, 無買到隻肥肥矮矮杯, 但返到屋企, 我又好掛住......因此, Brian 放工時, 經開咖啡店就買隻杯返黎!
買到心頭好, 心情好開心, 又唔知點解, 感覺依隻肥肥矮矮杯, 好襯食breakfast, 所以, 我連忙入廚房煮咗個all day breakfast 當dinner....哈哈!!
↓簡單一隻杯, 依間咖啡店都包得隻杯咁靚嘅! 哈哈!! 我好簡單一隻杯就令我開心成晚!! 哈哈! 
↓成餐dinner, 食到好似食早餐咁, 因為,我要用食物襯返我隻杯...哈哈!
↓買杯當日, 落好大雪, 仲好大風,.......Brian 成頭都係雪, 平時,好天就唔記得買, 到落雪天先記得去咖啡店買杯...哈哈!! 
上化妝堂
February 19, 2009 (Thursday)
今日, 又再同blog 友 Kitty 聚頭.....但今次相聚係主要同Kitty 一齊行化妝品店, 問下Kitty 化妝需知, 順便食個簡短lunch 和傾下計.......(都好似幾多野做)
其實, 我對化妝品係無任何知識架! 我連平時洗面都係用清水....如果,要去宴會, 我都好求其問啲妹or 媽咪借啲化妝品, 我就亂化一餐.....連眼線, 都無畫過就膽粗粗去宴會!! 自己諗返自己啲行為, 真係好得人驚架!!哈哈!!
人越大, 就知道化妝重要性, 化妝除咗可以去宴會時 or 去開會時, 可以令自己個樣精神啲外, 而且, 化妝都係一種有禮貌嘅表演........所以, 我都要"的"起心肝慢慢研究點先可以化到一個適合自己嘅自然妝!
但化妝品真係五花百門, 只係一雙眼....已經需要用好多化妝材料....唔怪之得, 女士平時嘅洗費比男士多喇!!
好彩, 在blog 上識到Kitty......, 平時可以傾下計外, 我仲可以親身, 問一問佢啲化妝材料, 究竟係咩東東!! Kitty 仲好有心機話比我知化妝品嘅用途, 我哋係商場係咁行化妝店, 我還在化妝品店學玩夾 "眼一毛", ... 哈哈!!............今日, 我同kitty 仲見到Mac 化妝專門店賣Hello kitty 化妝產品添!! 真係有啲衝動想買黎用!! 
每次, 同Kitty 見面, 一定有禮物收....今次, 話明研究化妝, Kitty 緊係送啲化妝品比我, 返屋企試玩喇!!!! Also, 我仲收到Kitty整嘅港式包, 好叻呀!連麵包都識整!! 味道仲唔錯添! 而且,啲麵包口味仲健康過出面麵包鋪啲麵包添!!
↓簡單嘅A & W (fast food) lunch!!! Lunch 途中 Kitty 介紹啲化妝品用途比我識添!!! 我依日同Kitty, 仲有行H&M童裝部....因為有hello kitty products..哈哈!! 
↓成個大袋都係Kitty 比我嘅禮物.....有Kitty 自家製嘅港式麵包,仲有beginner 用嘅化妝品......(Kitty, it was so nice to meet you! Thank you very much for the presents, that's too sweet of you!! )
** 今次, 同Kitty見面,我都有比袋禮物佢, 點知, 在坐電動扶手電梯時, 個袋爛咗, 兩樽蝦子麵就碌咗出黎..哈哈!! 好彩接得返, 但Kitty 就要在風雪下, "稱" 住兩樽好chinese 嘅蝦子麵, 行返番去公司開工!! 有啲唔方便!!! 哈!! 下次,我唔用紙套.....裝野比Kitty 喇!!