回家飯局

May 31 (Saturday)
    啱啱過去嘅weekend, 返咗媽咪度喇! 咪又係食食食囉!! 星期六,返到媽咪度就去咗飲茶

喇!! 去到間茶樓裝修係幾好, 但太多水晶燈, 所以, 整到成個場好熱,我都無心機食點心, 連相都無影!!

    食完一餐好焗嘅lunch 就同Brian去行咗陣街,  之後, 就約埋Daddy 去行街街, 去買酒, 因為媽咪會係dinner 煮海鮮餐, 當然買返支白酒嘆下

喇! 雖然, 我話同daddy and Brian 一齊去行街順便買酒, 但我係買酒途中經開啲超市, 就入咗超市行, 我又買咗成袋雜拔"none" 野, 先捨得返屋企, 我覺自己真係似師奶, 見平就掃貨, 哈哈!

   同daddy and  Brian 行完街返屋企, 無幾耐就開得飯.....今餐dinner 有蝦, 魚, 蜆, 仲有腐皮卷....好多好多, 我覺得好豐富喇! 我自己一定要用足成日時間先整到, 但媽咪幾鐘就個搞掂, 仲有埋湯!  成個煮飯超人咁!! 哈哈!!   而依餐dinner, 仲有兩支白酒添!! 我好衰, 我明知五妹飲酒唔唔叻, 我都會迫五妹飲酒...哈哈!! 其實, 我都係想五妹酒量好啲咋!! 哈哈!    食完飯最好娛樂緊係打牌喇!! 我打得好水皮呀!! 完全無天份...真係至在玩下!!

水瓜浸蜆(好鮮甜, 啲湯好好飲), 另外張相係腐皮卷, 係媽咪自己做架!!

我買咗兩支酒, 一支係香濱酒, 就係相中個支, 另外一支係白酒, 但我就唔記得影支白酒, 因為我掛住食囉!!  而右手面張相係魚柳肉炒西芹, 我好怕食西芹架!! 係四妹and 五妹先最喜歡食!!而係魚柳肉炒西芹傍邊係泰式酸辣汁...係媽咪識到個泰國朋友, 係佢教我媽咪整, 依個泰式汁好好味, 我連食菜都點架!! 哈!

啲蝦臨煮時都識 郁, 我咪攞黎嚇人, 攞黎玩囉!! 啲蝦用鹽水淥熟就食得喇!! 蝦啲肉質好爽呀!!

九杞湯 (媽咪話依隻湯叫九杞湯), 仲有一條新鮮蒸魚...其實,仲有肉碎炒豆角, 上湯菜心苗, 但我無影到, 係咁食食食...哈哈!

      打打下牌, 個個好想食宵晚甜品, 四妹男朋友話出去"許留山" 食甜品, ...個idea 唔錯, 其實, 許留山係加拿大開分店, 都開咗好多年喇!!! 但係我心目中都係同Brian 去過一次咋!! 計埋今次都係去咗第二次, 但依間許留山比我想像中靜, 都無咩人!! 我哋成班去食宵夜都食得細細聲咁!! 哈哈!! 我哋叫咗甜品食之外, 仲叫埋街邊腸粉食, 啲腸粉真係好好食, 好滑!! 我哋一行五個人 (Brian,我, 四妹, 四妹男朋友, and 五妹), 要食兩客先夠, 哈哈!!! 食完甜品, 買返兩碗甜品外賣, 返屋企比daddy, 返到屋企又再同daddy and 媽咪打牌, 打到零晨2am 先玩完!

我食咗椰汁黑糯米, 而Brian, 五妹 and 四妹都分別都叫咗芒果西米露

四妹男朋友叫咗"楊枝金露", ...我哋仲share 街邊腸粉,啲腸粉好yummy!

仲有咖哩魚蛋食添!

June 1(sunday)
     今日, 我都成十一點先起身, 我媽咪已經話比啲粽我喇!!! 話比我帶返自己屋企食, 但一比就比咗半打粽我.  我真係要慢慢食,...... 到下午一點我同媽咪去咗飲茶, 飲完茶仲成班人一齊行chinese 開嘅商場添!! 我哋仲買咗珍珠奶茶飲添!! 我哋行街見到food court 話有臭豆腐, 就買客黎試, 嘩!! 啲豆腐真係好臭呀!! 但一啲都唔香脆!! 我食完個肚仲有啲shake shake 哋添! 但Brian and 我屋企人食咗又無事! 哈哈!! 同屋企人行完街, 就同Brian 一齊執野返自己屋企喇!

一朝起身, 就叫Brian 幫我同daddy and 媽咪影副相先....之後,見到五妹有觸住影返張先, 我同五妹都有黑眼圈, 因為夜晚打完牌, 我哋一齊瞓, 又係咁傾八婆計, 傾到零晨四點!!