生日禮物 by air

October 13, 2009 (Tuesday)

    前幾日見到啲天氣好陰沉, 又大風, 又凍, 仲好似想落雨咁, 今朝見到有陽光, 天氣唔差喎!! 人都自然開朗啲...哈哈!!

    嘩! 嘩! 嘩!! 今日, 仲收到郵包添!! 咪又係我好朋友---爆炸魔女寄黎囉!!!

   今日lunch time, 我手電突然間響起, Brian 話管理處剛剛打電話黎, 話:「有郵包收呀!!! 應該係你等個份」, 所以, 我即刻以極速走返去管理處簽收.  (由於, 我居住condo, 個郵箱好細架咋!! 所以, 有少少大啲嘅郵包, 都會比管理處看管, 管理處, 會依郵包住址, 打電話通知)

    簽收時, 我見到個郵包都幾大個喎, 我依個好朋友, 又花咁多郵費寄生日禮物比我喇!!!  (其實, 我依個好朋友已經預先告知我, 寄出了郵件, 近幾天, 我就係等緊......郵包順利到達)

    拿着郵包坐電梯, 個心卜卜係咁跳, 又唔係第一次收郵包, 但我仍然好似好緊張咁, 哈哈!! 當打開郵包......, 見到一個Hello kitty 計數機,  嘩!!............. 真係好靚呀!! 我好鐘意呀!! 送計數機比我, 啱晒我喇!! 我周不時都左計右計住啲婆仔數架嗎, 哈哈! 份生日禮物對我黎講, 真係好實用,  依個朋友真係了解我!!

   郵包內, 仲有一張好特別嘅Hello kitty生日卡, 一封信, 和一本Hello kitty年曆, 打從舊年起, 依個朋友已經開始寄Hello kitty 年曆給我, 每年一本, 我現在, 每一天 或者 需要計劃下年啲日子,便看看這年曆, 依個朋友已經不知不覺地在我每天生活上,  浮現着!! 哈哈!!!!

   份郵包, 我睇完又睇, 啲字讀完又再讀, 每隻字, 每樣東西, 都好觸動我條感動線!! 有時發夢都無諗過, 會有朋友咁有我心, 對我如此關懷!!  而且, 在郵包上, 我看得出這個朋友花嘅了時間, 背後做咗唔少功夫, 才能寄份郵包到我手上架!!


    我知道每年, 依個時候, 我依個朋友, 就會好唔得閒架喇!! 除咗日常所碎事她要處理之外, 仲要為着我依個十月---壽星女嘅生日禮物而攪盡腦汁!! 亦花盡心思, 特別上街逛逛精品店, 選購特別禮物給我!! 其實, 我有無生日禮物都無咩所謂, 只寫幾隻字祝賀我生日, 我已經歡天喜地, 但當然收到生日禮物, 就會更加開心喇!! 但我居住在加拿大, 這個好朋友居住在香港, 相隔半個地球,  送什麼禮物, 都需要依賴郵局,  有一些物品, 又唔太適合郵寄!! 所以, 送生日禮物比我, 係一個極之高難度嘅考驗, 哈哈!!  現在, 郵包能夠順利到我手, 真係可以用 "難能可貴" 依四隻字形容!!

  我現在真係好開心, 同感覺到自己好幸運, ........老套啲都要講一聲"多謝你" and our friendship forever!!!

  係度唔發太多牢騷了!!  最後, 祝你(and 你一家人)身體健康!!

↓越洋生日禮物

**照例夜晚打電話返娘家, 我Daddy 話今天是我農曆生日, 我記得舊年, 我都係在農曆生日當天收到依個朋友份生日禮物架!! 今年又會咁啱得咁橋架!! 又係農曆生日當天收到. 哈哈!!