April 17,2014 (Thursday)
一打開個盒, 見到粉紅色心心蝶, 真係忍唔住講, 「好靚呀!」
收到Le creuset 粉紅色心心蝶做手信, 真係萬般開心.
平時, 係網上就見得多粉紅色心心蝶, 而家真實係面前. 真係覺兩隻蝶更加靚.
↓Brian父母去旅行, 買了一set LC 粉紅色心心蝶和一隻杯給我. 這些手信, 全是Brian 爸hand carry 帶返黎加拿大, 這次, 航空公司特許比客人寄手提行李入倉, 但Brian 爸堅決把手提行李留在身, 因為Brian爸話, 手提行李裡面, 係Vicky 啲Le creuset 黎㗎. (這些經過, 是Brian 媽細細聲同我講!) 聽到, 感動㗎!
我嘅喜好, 可能太容易比人觀察到.
現在, 在街上看到Hello Kitty, Le Creuset 及粉紅色物品. Brian 及Brian 父母, 都會加緊留意. 甚至會影張相比我睇.
↓其實, Brian 父母去旅行途中, 已經whats app 張相比我.問我想要相中的咩物品做手信.
↓由於Brian 父母對Le creuset 物品唔在行. 他們要我圈住, 我想要的Le creuset!! 我相信Brian父母就是帶這幅相, 比百貨公司嘅售貨員睇.
Brian 父母這個年紀, 快來快去, 去旅行. 聽他們行程, 我比他們後生, 都厭攰!!
而這次旅程, Brian 父母係我和Brian 返工時落機, 到達溫哥華.
但到我和Brian 放工返歸時, 已經見Brian 父母執好行李, 開機洗衫, 甚至玩緊電腦. 精神狀態非常好. 真是唔講, 都唔知他們去了兩星期, 非常緊揍嘅旅行.
但他們返黎加拿大之後, 在食方面, 就出街食啦!! 因為Nanny 仍在菲律賓中.
原本最喜愛研究新菜式的Brian 爸. 轉咗喜歡打網球. 落機第二日已經去咗打網球啦!! 其實, 我可以煮晚飯, 但Brian父母話唔好意思, 見我一放工就入廚房喎.
因此, 而家日日放工, 都出街食dinner. 我隻粉紅色心心蝶, 還未有機會用添!!
↓而家出街食飯, 通常食中菜. 叫啲小炒送白飯 or 白粥. (食過薑蔥爆豬潤,椒鹽白飯魚, 鹵水鴨)
↓依蝶鴨舌好野味........另一日晚餐, 又係叫啲小炒食飯. (蒜容西洋菜, 炸魚柳, 凌魚球), 而家望返啲相, 原來Brian 爸都幾鐘意食炸物. 哈哈
↓味菜肉絲, 茶熏鴨. (我覺美味)
↓也去過麥當當解決
↓晚餐, 去茶餐廳食. 原來茶餐廳啲晚餐combo, 都好多份量, 有飲品, 湯, 餐包+主菜.相中是咖哩牛腩飯, 咁食法, 真係好足夠
↓雞扒黑椒汁跟意粉, 還食過荷葉飯
↓出街食晚飯多, 開始唔叫晚餐combo, 單叫主菜食, 食過羊肉石頭飯, 日本豬扒飯
↓有一晚, 食炸雞批煎蛋火腿飯, 由於依個飯, 炸雞需要較多時間, 等蝶飯, 等到鋪頭無人. 哈哈~~ 不過,隻炸雞批好似細個時, 係大快活食嘅炸雞批, so yummy
↓有日晚餐, 食海鮮炒烏冬, Brian的咖哩牛腩飯又出現!!
↓晚餐, 我食凌魚肉魚湯米粉, Brian 食福建炒飯
↓我同Brian 遲放工, 原來9pm 之後去茶餐廳食, 有熱飲品送, 我們再來炸雞批火腿煎蛋飯. so yummy
April 13,2014 (Sunday)
溫哥華好多公園. 啲公園位置仲唔差. 圍繞海港邊. 望到山景. 公園設施都唔錯. 最緊要去公園啲人, 大部分都好有公德心, 所以, 去公園. 變咗好舒服. 我都鐘意去.
講起公園, 我就有個小小秘密想講......... 就係我仲好鐘意係公園打鞦韆
而家, 我都牛高馬大, 但我仍是好喜歡打鞦韆. Crazy
↓一朝早, 就去咗居所附近打鞦韆
↓越玩越Happy~~ 好彩Brian 都唔介意同我去公園打鞦韆. 我打鞦韆他都會推我. 但推推下, 他會行埋一邊玩電話. 但有陣時, Brian都會主動提議同我打鞦韆先返屋企. 其實, 他肯提議, 我都已經好happy. 哈哈~~
↓打鞦韆, 好似好簡單, 坐上去,搖下搖下, 但打鞦韆手腳都要好配合, 由其是對手又要觸實條鞦韆鏈. 玩耐都會見攰. Anyway, 體力, 真係唔夠細個多!!
見天氣好, 有又時間, 諗住返歸, 食少少嘢! 再去另一啲公園行.
點知食咗啲啲嘢之後, 就開始落雨. 但都出咗去, 就照行囉!!
還掂我有帶遮, 現在係溫哥華住, 帶把遮出街, 已經係其中一件隨身物.
↓溫哥華, 真係多公園, 依個係居所附近, 第二個公園. 望到Pacific Ocean. 溫哥華就是位於Pacific Ocean 嘅沿岸囉!! 所以去邊都要過海. 第一張相, 係溫哥華downtown. 但可能天陰, 我影到好似海市脣樓咁. 第二張相, 我想影啲貨船, 係Pacific Ocean 上面
↓行行下公園, 落雨. 一邊擔遮, 一邊照行公園.
↓行到差唔多, 去咗食下午茶, 之後 再去行居所, 另一邊嘅公園. (行第三個公園)
↓依個公園, 就多樹木啲. 但啲櫻花, 已經係水尾櫻花
↓啲櫻花已經跌係地下, 全地粉紅色
一日內行足三個公園. 仲行到天黑. 真係用咗好多體力.
所以, 都費事自己煮, 走咗出街食.
近日, 喜歡了台式口味. 見網上有間台式餐廳有啲好評, 就走去試.
↓依邊啲台式餐店. 通常個裝修都幾時尚, 依間餐店, 牆上啲燈會變色.
↓台式餐廳, 最特色, 每次去台式餐廳, 係望咗飲品menu 先. 飲咗芝麻豆花奶 & 鮮士多啤梨沙冰. Brian 食炸雞排飯
↓我食三杯雞飯....啲三杯雞. 啲雞醃得好好味. 仲份量大大, 好似好抵食. 哈哈~
April 12,2014 (Saturday)
這個星期六, 我就爽啦!!
我又唔洗返工, 書又可以唔洗溫住, 又可以瞓到自然醒. 真係瞓到連Breakfast & Lunch 都skip 埋. 而且, 仲係12號 (拍拖紀念日). 攞正牌出街玩!! Happy 萬分啦!
但另一邊嘅Brian, 就埋頭苦幹地工作. 他放工時, 我先起身無耐咋!!
↓星期六, 一出街, 即刻過橋, 向玩樂出發. 每次過依條橋, 都見飛機降落, 今次趕得切影到隻飛機. 其實, 見到飛機降落, 我感覺好親切, 因為我係香港居住時, 一出街就見到飛機降落. 我直情見住飛機開埋碌. 係溫哥華, 機場算好近民居. 所以,見飛機比例都多啲. 雖然飛機經過會嘈啲. 但鐘意依個感覺......而我星期六的第一餐, 成5pm 先食. 食咗風沙炸雞翼, 混醬腸粉 & 咸肉皮蛋粥. Brian 就好例牌, 食咗車仔麵 & 格仔餅
↓食完嘢, 就去行商場, 依個商場係香港人投資, 香港人經營, 所以, 每逢有節日, 都會有節日主題. 好特別 (因西人真係唔興同商場佈置, 除了聖誕節). 由於, 就黎復活節, 這個港人投資嘅商場, 就有復活節嘅大型裝飾. 幾有氣氛
行行下, Brian 話要用電腦做啲嘢. 做啲咩, 我唔記得啦!!
但我唔想返歸住, 所以, 就近近哋去咗間咖啡店, Brian 有Brian 做電腦啲嘢. 我有我嘆咖啡啦!!
點知去到依間咖啡店, 先發現這間咖啡店, 有個後花園, 好鬼舒服. 但這個後花園, 要從咖啡店的側門入, 好似好隱閉, 所以, 我形容這咖啡店的後花園做"神秘的花園".
我好開心, 可以發掘到依個"神秘的花園". 因為這個花園, 好有渡假feel. 令到我依個12號, 過得份外享受咁
以後, 黎多啲, 這間咖啡店, 扮下渡假都好. 哈哈~~
↓咖啡店的後花園, 望落去真係好舒服. 還有戶外heat 供應(粉紅色箭咀指住, 就係戶外heater). 最開心, 係依日, 個後花園無人. 好似去咗私人花園咁. 哈哈.
↓Brian 很努力開工, 做他電腦啲嘢, 最後, 係這個神秘的花園, 坐到天黑. 這後花園仲望到飛機 (紅色箭咀指住). 所以, 我份外喜歡這個咖啡店的後花園
咁每個月嘅12號, 點都會特別少少, 因為係我哋拍拖紀念日.
所以, 去咗買雪糕食, 當慶祝下
而依間雪糕店, 現在係網上長駐高峰. 所以, 每次去, 至少都排足半小時先買到. 但這雪糕店嘅味道, 真係好真材實料. 口味配塔, 又獨一.
不過, 真係出咗名, 就真係巴幣啲. 去到雪糕店, 咩都話買晒. 我想食嘅樽裝 Whiskey hazelnut 都賣晒呀!! 好彩 second choice 嘅Rocky Road ---仲有咋!!
↓去到網上長駐高峰嘅雪糕店門口. 入內排晒長龍
↓其實, 可以一個個scoop 買黎食, 但樽裝好似食得Happy 啲. 我臨走, 樽裝雪糕剩返依幾樽
↓買咗Rocky Road雪糕, 好美味, 雪糕內啲果仁好香脆, 啲棉花糖好似溶係口咁. 雪糕又滑, 好快吞晒. 美滿十二號!!
