平時,鼓勵吃得健康的Brian 爸, 同咗Brian媽去旅行.
我同Brian 係食方面, 仲唔發顛咩. 一於周街亂食嘢!!
好似, 講到我和Brian 係平時好似無啖好食咁.
其實, 我哋係平時, 自由度都很大, 只係見Brian 父母去咗玩, 我哋又去玩下囉!!
咁我同Brian 最有興趣就係行街和食. 而家大忙人Brian 做足七日工, 行街唔可以行得多. 所以, 我哋當然向食, 依方面進發.
↓平時, 早餐要食水果, 我見到Brian 爸臨去旅行前, 都準備咗一袋袋水果係冰格. 雖然Brian 爸無出聲, 但一打開冰格, 都心照啦!! 我哋都係出街食咗一, 兩餐街外早餐, 之後, 大部分breakfast 都食返冰格啲袋裝水果. 而相中個港式早餐, 原來好利害,有飲品, 有波蘿油, 還有......
↓還有火腿雙蛋, 仲跟有一碗沙爹牛肉公仔麵. 碗公仔麵仲要好大碗. 上面兩張相, 同埋下面依兩張相啲食物, 全是一個早餐嘅combo, 食完真係頂到上心口. 全日可以唔洗再進食都得.
↓而有一日, 就食咗麥當當早餐. 又是食完, 個肚就好full 嘅感覺
↓去街食早餐, 真係好危險, 所以, 顛咗一陣, 就還原幾本步, 留係屋企食. 但都有件唔健康嘅午餐肉做早餐嘅點綴. 但之後, 就好乖, 日日食Brian 家的冰格水果和例牌cereal. Cereal 內裡有藍莓, 還有唔知咩莓, walnut, 還有唔知咩fiber. 仲有pure syrup.
雖然係無皇管. 但係閒日夜晚, 出街顛, 都唔去得邊, 因為Brian 放工時間都唔早. 第二日我哋又要早起. 所以, 我哋閒日晚餐, 攞正牌去顛, 都顛唔得幾多!!
不過, 有時做得攰, 出街食, 又唔洗clean dishes. 係幾乾手淨腳嘅!!
↓食過一,兩餐麥當當晚餐
↓有一餐, 去咗飯店, 食晚餐. 食馬來喇沙, 叉燒燒鴨飯, 叫咗苦瓜煲和薑蔥爆腰潤
↓Brian父母去旅行時, 我和Brian 發過一次宵夜癮, 去咗Tim Hortons 食小型甜圈(Timbits). 點知我哋去到Tim Hortons . 全間舖得我和Brian, 好驚呀!! 買完坐陣, 即走.
住了Brian 家之後, 我飯又唔洗煮, 塵又唔洗吸. 廁所又唔需要我洗. 房都唔洗抹. 垃圾都唔洗我倒. 我剩係去返工. 真係前所未有過嘅生活. 原因係Brian 家有Nanny 代勞嗎!!
But, Brian父母去旅行之際, Brian 家的Nanny, 都返咗菲律賓探親.
所以, 本來的飯, 我要開始煮返, 廁所要開始洗返, 房又需要抹返, 連垃圾都需要我倒返!!
其實, 依啲工夫, 我以前都做開, 仲日日做.
但人就係咁, 嘆慣咗, 當要做返時. 真係有點不慣. 做一做, 就好似好攰咁. 但又無話, 做唔到. 要做都一樣做到.
不過, 內心有啲掛住Nanny!! 你快啲探完親, 返黎啦!!
↓出街食, 唔食得幾多, 所以, Brian 父母去旅行, Nanny 又去探親之際, 我就開始煮返飯.不過, 煮得好簡單. 煮過什菜咖哩雞, 我用日本咖哩磚煮. 還有番茄蛋. 另一日, 蠔油洋蔥雞翼, 椰菜花, and 蒸咗條蠟腸
↓有日晚餐, 我整過大堆頭奄例+罐頭湯. 之後有日,整咗個懶人版嘅電飯煲蠟味糯米飯
↓由於Brian 喜歡蠟味糯米飯, 所以打後幾餐, 就唔食白飯, 食蠟味糯米飯做主食. 又係好簡單整咗紅椒日式咖哩雞翼, 還有腐乳白菜雞煲
點知, 我竟然係Brian 父母去旅行期間, 我打敗仗. 感冒到灰灰暗暗, 工都返唔到. 瞓足一天. 個菌仲黎得突然, 我臨瞓前, 都好哋哋, 一起身, 就全身攰到難以形容! 意識到自己病咗. 咳和流鼻水, 齊晒. 真係咩神都無.
但其實, 今次病都好好彩. 如果我病咗, Brian父母在場, 他們肯定仲緊張過我. 叫食依隻藥, 嗰隻藥, 伸埋條痢,睇喉嚨都似. 總之, 我最怕人擔心. 真係收埋自己係房一整天, 瞓夠就算!!
↓病時, Brian 買了藥比我. 還有甜點作送藥之用. 甜點除了hello kitty 復活蛋糖果, 還有我去法國時,時刻喜歡嘅canelé 蛋糕. 加拿大賣成$4 (加幣)一粒. 唔平. 但Brian 竟買黎比surprise 我. Happy~
我病完, 胃口又開返, 食完晚飯, 逼Brian 同出街食飯後甜品. 病時食得清, 兼無咩味覺, 病完仲唔發顛!! 哈哈!!
↓病完之後, 去咗食日式Parfait, 還有去麥當當飲凍芒果冰 and 食軟雪糕
籍今次Brian 父母去咗旅行, 我發覺Brian 父母靜召召幫我和Brian 準備咗很多東西, 不過, Brian 父母事前, 完全沒有出聲. 但當我和Brian需要時, 就會發覺, Brian 父母已經準備好晒
好像冰櫃裡, 大包細包的水果和肉食, 每袋都寫上數目和份量. 跟本就是為我和Brian 而設.
家中的日用品櫃, 全裝到滿滿.
由於, 要清潔廁所, 所以啲清潔濟上, 有便條, 加以說明. 真是怕我們會在清潔消毒時, 會整傷.
還有平時, Brian 爸不容許我們吃太多罐頭食品, 也在旅行前, 買很多罐頭在食物櫃!!
一切一切都是靜靜雞準備好, 事前完全沒有說過一句. 而Brian父母的月結, 也去咗轉脹. 我和Brian 真是理掂自己就得.
但感覺到Brian爸很信任我和Brian. 知道我和Brian 係會攪得掂. 所以, 他們去旅行時, 真是一句勸告嘅說話都無!! 真係大家都舒服和開心!
